Formannskapslovene
av 1837 er opphavet til at det vart oppretta formannskapsdistrikt i Noreg. I
utgangspunktet var det dei gamle prestegjelda som skulle utgjere eit
formannskapsdistrikt. Ein byrja noko seinare på 1800-talet å kalle desse
formannskapsdistrikta for herad, og på 1900-talet vart kommunenemninga den
vanlegaste.
Då
formannskapslovene av 1837 vart sett ut i verk, femnde det dåverande Akerø
herad om dei seinare herada Nord-Aukra, Sør-Aukra, Sandøy og Fræna. Desse
bygdene høyrde då til i Akerø prestegjeld. Første møtet i formannskapet vart
halde på Akerø prestegard den 20. januar 1938, og Nils Andersen Flaae vart vald
som første ordføraren i Agerø formannskapsdistrikt.
Alt i 1840
vart Fræna skild frå som eige herad.
Ein
kongeleg resolusjon av 16. august 1866 fastslo at heradet skulle delast. Frå og
med 1. januar 1867 vart Sandøy skild ut som eige herad, og folketalet i det
utskilde heradet utgjorde då 601 innbyggjarar. Det gjenverande Akerø herad
hadde samstundes 2026 innbyggjarar.
Namnet på
heradet vart endra frå Akerø til Aukra ved kongeleg resolusjon av 3. november
1917. Aukra herad vart igjen delt frå og med 1. januar 1924, denne gongen i dei
to lutane Nord-Aukra og Sør-Aukra. Delinga var grunna i ein kongeleg resolusjon
av 5. oktober 1923. Ved delinga utgjorde folketalet i Nord-Aukra 1395
innbyggjarar, medan det var 1677 innbyggjarar i Sør-Aukra.
Sør-Aukra
vart frå og med 1. januar 1965 slege saman med Dryna og eit område på Miøya frå
Vatne herad til den nye Midsund kommune med 2246 innbyggjarar.
Nord-Aukra
har vorte verande eigen kommune sidan delinga i 1924, men ein liten krins vart
utskild frå kommunen den 1. januar 1964, då Mordal krins med sine 77
innbyggjarar gjekk over frå Nord-Aukra kommune til Molde kommune. Kommunen
skifta også i 19?? namn frå Nord-Aukra til Aukra kommune.
Aukra
kommune består hovudsakleg av øya Gossen, men har også nokre mindre øyer samt
ein fastlandsdel på austsida av Julsundet.
Kjelder: Helland, A.: Romsdals amt, bd. II.
Kristiania 1911
Olafsen-Holm, J.: Romsdals
amt. Møre og Romsdal fylke. Ålesund 1939
SSB: Historisk oversikt
over kommune- og fylkesinndelingen. Oslo 1999